ചോദ്യം: അറബി കലണ്ടറിലെ മറ്റുമാസങ്ങളെ ഉപേക്ഷിച്ച് റജബില് ഉംറ ചെയ്യാന് ചിലര് അതീവ താല്പര്യമെടുക്കുന്നു. ഉംറകളില് ഏറ്റവും പ്രതിഫലമുള്ളത് ആ മാസത്തിലേതാണെന്ന് അവര് പറയുന്നു. ഇത് ശരിയാണോ? അങ്ങനെയെങ്കില് , റമദാനിലെ ഉംറയുടെ പ്രതിഫലത്തെയും അത് കവച്ചുവെക്കുമോ?
ഉത്തരം: അല്ലാഹു വിശുദ്ധമാസങ്ങളായി തെരഞ്ഞെടുത്തിട്ടുള്ളത് 4 മാസങ്ങളെയാണ്. ‘ആകാശഭൂമികളുടെ സൃഷ്ടി നടന്ന നാള് തൊട്ട് അല്ലാഹുവിന്റെ അടുക്കല് ദൈവികപ്രമാണമനുസരിച്ച് മാസങ്ങളുടെ എണ്ണം പന്ത്രണ്ടാണ്. അവയില് നാലെണ്ണം യുദ്ധം വിലക്കപ്പെട്ടവയാണ്. ഇതാണ് യഥാര്ഥ നിയമക്രമം. അതിനാല് ആ നാലുമാസം നിങ്ങള് നിങ്ങളോടുതന്നെ അക്രമം കാണിക്കാതിരിക്കുക.'(അത്തൗബ : 36).
ഈ സൂക്തത്തില് ആ നാലുമാസങ്ങളേതെന്ന് വിശദമാക്കിയിട്ടില്ല. അതെസംബന്ധിച്ച് നമുക്ക് പ്രവാചകചര്യയിലാണ് കാണാനാവുക. അബൂബക്ര്(റ)ല് നിന്ന് നിവേദനം: റസൂല് തിരുമേനി(സ) ഹജ്ജുവേളയിലെ തന്റെ വിടവാങ്ങല് പ്രഭാഷണത്തില് പറഞ്ഞു: ‘ഭൂമി-ആകാശങ്ങളെ അല്ലാഹു സൃഷ്ടിച്ച നാള് മുതല് അതിന് അല്ലാഹു കാലഗണന നിശ്ചയിച്ചിരിക്കുന്നു. ഒരു വര്ഷത്തില് പന്ത്രണ്ട് മാസങ്ങളാകുന്നു ഉള്ളത്. അതില് നാലെണ്ണം വിശുദ്ധമാക്കപ്പെട്ടിരിക്കുന്നു. ഒന്നൊഴിച്ചുള്ള മൂന്നുമാസങ്ങള് തുടര്ച്ചയായി വരുന്നവയാണ്. അത് ദുല്ഖഅദ്, ദുല് ഹജ്ജ് , മുഹര്റം. നാലാമത്തേത് റജബ്. ജുമാദല് ആഖിറിന്റെയും ശഅ്ബാന്റെയും ഇടയിലുള്ള ആ മാസത്തിന് മുദര് ഗോത്രത്തിന്റെ പേരിടുകയായിരുന്നു’ (ബുഖാരി, മുസ്ലിം).
- റജബില് നോമ്പെടുക്കുന്നതില് പ്രത്യേകപ്രതിഫലമുണ്ടെന്ന തരത്തില് നബിതിരുമേനിയില് നിന്ന് ആധികാരികമായ പ്രസ്താവനകള് ഇതുവരെ കാണപ്പെട്ടിട്ടില്ല. എല്ലാ അറബിമാസങ്ങളിലെ തിങ്കള്, വ്യാഴം, ദിവസങ്ങളിലും 13-14-15 തീയതികളിലും വ്രതമനുഷ്ഠിക്കുന്നതുപോലെ റജബിലും പ്രവാചകതിരുമേനി അനുഷ്ഠിച്ചിട്ടുണ്ടെന്ന് മാത്രം.
അപ്രകാരം, റജബിലെ ഉംറയ്ക്ക് പ്രത്യേകപ്രതിഫലം ഉണ്ടെന്ന വിവരണത്തോടെ പ്രവാചകന്റെയോ അദ്ദേഹത്തിന്റെ സ്വഹാബികളുടെയോ പ്രാമാണികമായ ഉദ്ധരണികള് കണ്ടിട്ടില്ല. - പ്രവാചകന്തിരുമേനി (സ) റജബ് മാസത്തില് ഉംറ ചെയ്തതായ ആധികാരിക ഹദീഥുകള് ഇല്ല. അതേസമയം റജബ് മാസത്തില് നബി(സ) ഉംറചെയ്തുവെന്ന ഇബ്നു ഉമര്(റ)ന്റെതായി വന്ന ഉദ്ധരണിയെ ഉമ്മുല് മുഅ്്മിനീന് ആഇശ(റ) തള്ളിക്കളഞ്ഞിട്ടുണ്ട്.
ഉര്വത്തുബ്നു സ്സുബൈര്(റ) ല്നിന്ന് നിവേദനം: ‘ഞാനും ഇബ്നു ഉമറും നബി പത്നി ആഇശ(റ)യുടെ വീടിന്റെ ചുവരില് ചാരിയിരിക്കുകയായിരുന്നു. അകത്തുനിന്ന് ആ മഹതി പല്ല് തേക്കുന്ന ശബ്ദം കേട്ടു. അപ്പോള് ഞാന് ചോദിച്ചു: ‘അല്ലയോ അബൂ അബ്ദുര്റഹ്മാനേ(ഇബ്നു ഉമറിന്റെ അപരനാമം), മുഹമ്മദ് നബി റജബില് ഉംറ ചെയ്തിട്ടുണ്ടോ?’ അതെയെന്ന അര്ഥത്തില് അദ്ദേഹം ഉത്തരം നല്കി. അപ്പോള് ഞാന് പറഞ്ഞു:’വിശ്വാസികളുടെ മാതാവേ, അബൂഅബ്ദുര്റഹ്മാന് പറഞ്ഞത് താങ്കള് കേള്ക്കുന്നുണ്ടോ?’ അപ്പോള് ആഇശ(റ)’എന്താണ് അദ്ദേഹം പറയുന്നത് ? ‘ എന്ന് ചോദിച്ചു. ഞാന് പറഞ്ഞു: ‘പ്രവാചകന് റജബ് മാസത്തില് ഉംറ ചെയ്തിട്ടുണ്ടെന്നാണ് അദ്ദേഹം പറയുന്നത്’. അപ്പോള് ആഇശ(റ) ഇങ്ങനെ പ്രതിവചിച്ചു: ‘അല്ലാഹു അബൂ അബ്ദുര്റഹ്മാന്റെ മേല് കരുണ ചൊരിയട്ടെ. എന്റെ ദീന് തന്നെയാണ! നബിതിരുമേനി റജബില് ഉംറ ചെയ്തിട്ടില്ല. അദ്ദേഹം ഞാനില്ലാതെ ഒരു ഉംറയും നിര്വഹിച്ചിട്ടില്ല.’ ഇതുകേട്ട് ഇബ്നു ഉമര് (റ) ഒന്നും പറയാതെ നിശ്ശബ്ദനായി ഇരുന്നു.’ - റജബ് മാസത്തില് ഉംറ ചെയ്താല് പ്രത്യേക പ്രതിഫലമുണ്ടെന്ന വെളിപ്പെടുത്തലോടെ നബിതിരുമേനിയുടെ ഹദീഥുകള് ഇല്ല. പക്ഷേ പ്രവാചകതിരുമേനി ഇപ്രകാരം പറഞ്ഞിട്ടുണ്ട്: ‘റമദാനിലെ ഉംറയ്ക്കുള്ള പ്രതിഫലം ഹജ്ജിന് തത്തുല്യമാണ്’.
- ഏതെങ്കിലും അടിസ്ഥാനകര്മങ്ങള്ക്ക് (തഅബ്ബുദിയായവ) ഒരു പ്രത്യേകസമയത്ത് അനുഷ്ഠിച്ചാല് അളവറ്റ പ്രതിഫലമുണ്ടെന്ന് ഇസ്ലാമിന്റെ മൗലികപ്രമാണങ്ങള് വ്യക്തമാക്കാത്തതിനാല് ആദരണീയരായ ഇമാമുകള് അത്തരത്തില് അഭിപ്രായപ്രകടനങ്ങള് നടത്തിയിട്ടില്ല. അവ്വിധം പ്രതിഫലമുള്ളവയെക്കുറിച്ച് പ്രമാണങ്ങളില് നേര്ക്കുനേരെ പരാമര്ശം കാണാനാകും എന്ന് നാം മനസ്സിലാക്കേണ്ടതാണ്.
- ഏതുമാസത്തിലും നിര്വഹിക്കുംപോലെ റജബിലും ഒരാള്ക്ക് ഉംറ നിര്വഹിക്കാം. എന്നാല് റജബ് മാത്രം പ്രതീക്ഷിച്ച് മറ്റു മാസങ്ങള് ഒഴിവാക്കി ഉംറ വൈകിക്കുന്നതിന് ന്യായീകരണമൊന്നുമില്ല. അത് പ്രതിഫലത്തില് യാതൊരു വര്ധനയുമുണ്ടാക്കില്ല. അതേസമയം , വിശുദ്ധമാസങ്ങളില് പോയി ഉംറ നിര്വഹിക്കണമെന്ന് ഒരാള് ആഗ്രഹിക്കുന്നതിലും തെറ്റില്ല. അല്ലാഹുവാണ് ഏറ്റം നന്നായി അറിയുന്നവന്.
മഹ്മൂദ് ഇസ്മാഈല്
Add Comment