അത്ഭുതകൃത്യങ്ങളുടെ ഇനങ്ങള്‍ ഇസ് ലാമില്‍

ഇസ്‌ലാമിക ദൈവശാസ്ത്ര ഗ്രന്ഥങ്ങളില്‍ മുഅ്ജിസത്ത് അടക്കുമുള്ള സംഭവങ്ങളെ എട്ടിനങ്ങളായി തിരിച്ചിരിക്കുന്നു.

1. ആയത്ത്: ദൃഷ്ടാന്തങ്ങള്‍, അടയാളങ്ങള്‍ എന്നാണിതുകൊണ്ട് ഉദ്ദേശിക്കുന്നത്. ‘സത്യനിഷേധികള്‍ പറയുന്നു: ‘ഇയാള്‍ക്ക് എന്തുകൊണ്ടാണ് ഇയാളുടെ നാഥനില്‍നിന്ന് ഒരടയാള(ആയത്ത്) വും ഇറക്കിക്കിട്ടാത്തത്?’ ‘(അര്‍റഅ്ദ് 27).
‘അവര്‍ ചോദിക്കുന്നു. ഇയാള്‍ക്ക് ഇയാളുടെ നാഥനില്‍നിന്ന് അത്ഭുതദൃഷ്ടാന്തങ്ങള്‍(ആയാത്ത്) ഇറക്കിക്കൊടുക്കാത്തതെന്ത്'(അല്‍അന്‍കബൂത് 50)

2. ഇര്‍ഹാസ്വ്: പ്രവാചകത്വം കരസ്ഥമാക്കുന്നതിന് മുമ്പ് ഒരു വ്യക്തിയില്‍ നിന്നുണ്ടാകുന്ന അത്ഭുതസംഭവങ്ങള്‍

3. അലാമത്: അടയാളം. ‘ആയത് ‘എന്നതിന്റെ അതേ അര്‍ഥം. ലോകാവസാനത്തിന്‍െര അടയാളമായി വരുന്നവ.

4. കറാമത്; ‘അനുഗ്രഹങ്ങള്‍’. സിദ്ധന്‍മാര്‍ കാണിക്കുന്ന അത്ഭുത കൃത്യങ്ങള്‍ ജനങ്ങള്‍ക്ക് ഉപകാരം എന്ന നിലയിലും അടയാളങ്ങള്‍ എന്ന നിലക്കും ഇവ പ്രകടമാവുന്നു.

5. ഇസ്തിദ് റാജ്: ദൈവാനുമതിയോടെ പിശാച് കാട്ടിക്കൂട്ടുന്ന പ്രകൃതിവിരുദ്ധകൃത്യങ്ങള്‍.

6. മഊനത്ത്: സ്വൂഫികള്‍ ചെയ്യുന്ന അത്ഭുതകൃത്യങ്ങള്‍.

7. ഇഹാന: ചെകുത്താന്റെ അനുമതിയോടെ ചെയ്യുന്ന അത്ഭുതകൃത്യങ്ങള്‍. ചെയ്യുന്നവനുതന്നെ ഇത് തിരിച്ചടിയായി മാറുന്നു.

പ്രവാചകന്റെ കാലത്ത് സംഭവിച്ച ഏതാനും അത്ഭുതസംഭവങ്ങളെക്കുറിച്ച് ഖുര്‍ആനിലും ചരിത്രഗ്രന്ഥങ്ങളിലും പരാമര്‍ശിക്കുന്നുണ്ട്.

1. ചന്ദ്രഭേദനം: ‘അന്ത്യനാള്‍ ആസന്നമായി .ചന്ദ്രന്‍ പിളര്‍ന്നു. എന്നാല്‍ ഏതുദൃഷ്ടാന്തം കണ്ടാലും അവരതിനെ അവഗണിക്കുന്നു.'(അല്‍ഖമര്‍ 1,2)

2. ബദ്‌റില്‍ മുസ്‌ലിംകള്‍ക്ക് ലഭിച്ച പ്രത്യേകസഹായം.’നിങ്ങള്‍ക്ക് ഒരു നന്‍മ ഭവിച്ചാല്‍ അവര്‍ക്ക് ഖേദംതോന്നുന്നു. നിങ്ങള്‍ക്കൊരു ദോഷം പിണഞ്ഞാലോ സന്താഷിക്കുകയും ചെയ്യുന്നു. പക്ഷേ, നിങ്ങള്‍ ക്ഷമയോടെ , ദൈവഭക്തിയോടെ പ്രവര്‍ത്തിക്കുകയാണെങ്കില്‍ അവരുടെ കുതന്ത്രങ്ങളൊന്നും ഏശുന്നതല്ല. അവര്‍ പ്രവര്‍ത്തിക്കുന്നതിനെയെല്ലാം അല്ലാഹു വലയംചെയ്തിരിക്കുന്നു. (പ്രവാചകന്‍ താങ്കള്‍ ആ സന്ദര്‍ഭം മുസ്‌ലിംകളെ ഒന്ന് അനുസ്മരിപ്പിക്കുക)നീ സ്വകുടുബത്തില്‍നിന്ന് പുലര്‍കാലത്ത് ഇറങ്ങിത്തിരിക്കുകയും വിശ്വാസികളെ യുദ്ധത്തിനായി (ഉഹുദ് മൈതാനത്ത്) അവരവരുടെ സ്ഥാനങ്ങളില്‍ നിയോഗിക്കുകയുംചെയ്ത സംഭവം'(ആലുഇംറാന്‍ 120,121)

3. ഇസ്‌റാഅ് മിഅ്‌റാജ്

4. ഖുര്‍ആന്‍: ‘ഇതിന് മുമ്പ് നീ ഒരൊറ്റ പുസ്തകവും പാരായണംചെയ്തിട്ടില്ല. നിന്റെ വലതുകൈകൊണ്ട് നീ അതെഴുതിയിട്ടുമില്ല. അങ്ങനെയായിരുന്നെങ്കില്‍ ഈ സത്യനിഷേധികള്‍ക്ക് സംശയിക്കാമായിരുന്നു'(അല്‍അന്‍കബൂത് 48).

ഹദീസുകളില്‍ ചില അത്ഭുതങ്ങളെക്കുറിച്ച് പരാമര്‍ശിക്കുന്നുണ്ട്. അവയില്‍ ചിലത് താഴെകൊടുക്കുന്നു:

1. ബദ്‌റില്‍ ഓരോ മുശ് രിക്കും ഏതേത് സ്ഥലത്ത് വധിക്കപ്പെടുമെന്ന് പ്രവാചകന്‍ മുന്‍കൂട്ടി കാട്ടിക്കൊടുത്തു.

2. ഒരാട്ടിന്‍കുട്ടിയുടെ മാംസം ഒരു സാഅ് ബാര്‍ലി എന്നിവയാല്‍ പ്രവാചകന്‍ ആയിരത്തിലേറെ പേരെ ഊട്ടി.

3. പ്രവാചകന്‍ ഖുത്വുബ പറയുമ്പോള്‍ കയറിനില്‍ക്കാറുണ്ടായിരുന്ന ഈത്തപ്പനത്തടി ഒരിക്കല്‍ വിലപിച്ചു.