വിശുദ്ധ ഖുര്‍ആന്‍ വളരെ വിശാലമായ ഭാഗം തന്നെ ചരിത്ര-കഥാ വിവരണങ്ങള്‍ക്കായി നീക്കിവെച്ചിരിക്കുന്നു. എന്നല്ല ചരിത്രകഥനത്തിന് വിശുദ്ധ ഖുര്‍ആന്‍ നല്‍കിയ പ്രാധാന്യം മറ്റൊരു വിഷയത്തിനും ലഭിച്ചിട്ടില്ല എന്നതാണ് വസ്തുത. ഖുര്‍ആന്റെ നാലില്‍ ഒരു ഭാഗത്തോളം വരുന്ന ആയത്തുകള്‍ ചരിത്രകഥനങ്ങളാണ് ഉള്‍ക്കൊള്ളുന്നത്. മുപ്പത് ജുസ്അ് ഉള്ള ഖുര്‍ആനില്‍ എട്ട് ജുസ്അ് മേല്‍പറഞ്ഞ കഥകളെയാണ് പ്രതിനിധീകരിക്കുന്നത്. ഇക്കാര്യത്തില്‍ നമുക്ക് അല്‍ഭുതം തോന്നേണ്ട കാര്യമില്ല. കാരണം വിശുദ്ധ ഖുര്‍ആനിലെ കഥാവിവരണം കേവലം ഏതെങ്കിലും ഒരു ലക്ഷ്യം മാത്രം മുന്‍നിര്‍ത്തിയുള്ളതല്ല. മറിച്ച് ഒട്ടേറെ ലക്ഷ്യങ്ങള്‍ മുന്നില്‍ വെച്ചുള്ളവയാണ്. വിശുദ്ധ ഖുര്‍ആനിലെ കഥാവിവരണം കൊണ്ടുള്ള ഏതാനും ഉദ്ദേശ്യങ്ങളാണ് താഴെ വിവരിക്കുന്നത്.
- മനസ്സില്‍ ആദര്‍ശം ഉറപ്പിച്ച് നിര്‍ത്തുന്നതിനും, അത് മുഖേന ബുദ്ധിക്ക് ഉള്‍ക്കാഴ്ചയും ഹൃദയത്തിന് സജീവതയും ഉണ്ടാകുന്നതിനും ചരിത്രകഥനം ഉപകരിക്കുന്നു. ദൈവത്വം, സന്ദേശം, പരലോകം ഈ മൂന്ന് അടിസ്ഥാനങ്ങളും ഒട്ടേറെ മുഖ്യപ്രശ്‌നങ്ങള്‍ ഉള്‍ക്കൊള്ളുന്നവയാണ്. അല്ലാഹുവിന്റെ കഴിവ്, അവന്റെ നീതി, ഏകത്വം, യുക്തി, അടിമകളോടുള്ള സ്‌നേഹം തുടങ്ങിയവ ഉള്‍ക്കൊള്ളുന്നവയാണ് പ്രസ്തുത കഥകള്‍.
സന്ദേശവുമായി ബന്ധപ്പെട്ട പ്രവാചകന്‍മാരുടെ ഉന്നത സ്വഭാവഗുണങ്ങള്‍ പ്രകടമാകുന്ന സംഭവങ്ങള്‍ ഉദ്ധരിക്കുന്നു വിശുദ്ധ ഖുര്‍ആന്‍. ജനങ്ങള്‍ അവരില്‍ മാതൃക കണ്ടെത്താനും, അവരെ ആദരിക്കാനും പിന്‍പറ്റാനുമാണ് അത്. പരലോകത്തെ കുറിച്ച ചര്‍ച്ച, അവിടത്തെ സംഭവവികാസങ്ങളുടെയും കണക്ക് തീര്‍ക്കലുകളുടെയും ചെറുമാതൃകകള്‍ സൃഷ്ടിച്ച് കൊണ്ടാണ് കഥനം നടത്തുന്നത്. - ചില ഗുണങ്ങളില്‍ മൃഗത്തോട് ചേരുന്ന മനുഷ്യന്‍ അവയില്‍ നിന്ന് വേറിട്ട് നില്‍ക്കുന്നതിലേക്കും പ്രസ്തുത കഥകള്‍ വഴികാണിക്കുന്നു. മനുഷ്യന്റെ ആത്മീയവും, സ്വഭാവപരവും മാനസികവുമായ ഔന്നത്യമാണ് ഇതുകൊണ്ട് ഉദ്ദേശിക്കപ്പെടുന്നത്. ഈ മഹത്തായ പദവിയിലേക്ക് മനുഷ്യനെ എത്തിക്കുന്നതില്‍ ഖുര്‍ആന്‍ കഥകള്‍ നിര്‍ണായക പങ്ക് വഹിക്കുന്നു.
- ശക്തിയുടെ മാര്‍ഗങ്ങള്‍, അതിന്റെ വഴികള്‍ തുടങ്ങിയ ഭൗതിക മാനദണ്ഡങ്ങളിലേക്കുള്ള വഴിയും ഈ കഥകള്‍ നിര്‍ണയിക്കുന്നുണ്ട്. കാരണം മനുഷ്യജീവിതത്തിന്റെ സുപ്രധാനമായ ഘടകം തന്നെയാണ് ഭൗതികമായ മാനദണ്ഡങ്ങള്‍.
- സമൂഹങ്ങളുടെയും, വിവിധ വിഭാഗങ്ങളുടെയും നാശത്തിന് വഴിയൊരുക്കുന്ന കാരണങ്ങള്‍ അപഗ്രഥിക്കാനും അവ മനസ്സിലാക്കാനും ചരിത്രകഥനങ്ങളേക്കാള്‍ ഉത്തമമായ മാര്‍ഗങ്ങളില്ല. വിശുദ്ധ ഖുര്‍ആന്‍ അല്‍ഭുതകരമായ വിധത്തില്‍ ഇക്കാര്യം വിശദീകരിച്ചിരിക്കുന്നു. ആഢംബരം, ധിക്കാരം, അഹങ്കാരം, അക്രമം, തീവ്രവാദം, ചിന്താദാരിദ്ര്യം, അഥമപ്രമത്തത തുടങ്ങിയ ഒട്ടേറെ ഉദാഹരണങ്ങള്‍ വിശുദ്ധ ഖുര്‍ആന്‍ എണ്ണിപ്പറഞ്ഞിട്ടുണ്ട്.
- പ്രായോഗിക ജീവിതത്തില്‍ നിന്ന് ഒട്ടും വേര്‍പെടാത്ത കാര്യമാണ് യഥാര്‍ത്ഥ മതബോധമെന്ന് ഈ കഥകള്‍ വ്യക്തമാക്കുന്നു. അവ രണ്ടും പരസ്പരം ബന്ധിതവും പൂരകങ്ങളുമാണ്.
- ആത്മീയ സൗഖ്യത്തിന്റെ വഴികളും, ഭൗതിക പുരോഗതിയുടെ കാരണങ്ങളും ഈ കഥകള്‍ വ്യക്തമാക്കുന്നുണ്ട്. ഈ കഥകളില്‍ നിന്ന് പാഠം ഉള്‍ക്കൊണ്ട് വിശ്വാസി ഇഹ-പര ലോകങ്ങളില്‍ സൗഖ്യപൂര്‍ണമായ ജീവിതം നയിക്കാനാണ് അത്.
- പ്രപഞ്ചം, മനുഷ്യന്‍, ജീവിതം, ആകാശ-ഭൂമികളിലെ ജീവജാലങ്ങള്‍ തുടങ്ങിയവയെക്കുറിച്ച ഒട്ടേറെ യാഥാര്‍ത്ഥ്യങ്ങളിലേക്ക് ഈ കഥകള്‍ വിരല്‍ ചൂണ്ടുന്നു. ഓരോ ദിവസം കഴിയും തോറും ഇക്കാര്യങ്ങള്‍ക്ക് കൂടുതല്‍ വ്യക്തത കൈവരികയാണ് ചെയ്യുന്നത്.
- മനോഹരമായ ശൈലി, ആകര്‍ഷക ആഖ്യാനഘടന, സുന്ദര ഭാവന തുടങ്ങി സാഹിത്യകാരന്‍മാരുടെ ഹൃദയം കവരുന്ന അവതരണ രീതിയാണ് വിശുദ്ധ ഖുര്‍ആന്‍ ചരിത്രകഥനത്തില്‍ ഉപയോഗിച്ചിരിക്കുന്നത്.
വിശുദ്ധ ഖുര്‍ആന്റെ കഥാകഥനം മനുഷ്യചരിത്രത്തിന് ഒരു പുതിയ അനുഭവം തന്നെയായിരുന്നു. പൂര്‍വവേദങ്ങളില്‍ പരാമര്‍ശിക്കപ്പെട്ട കഥകള്‍ പോലും വിശുദ്ധ ഖുര്‍ആന്റെ ശൈലിയില്‍ നിന്ന് തീര്‍ത്തും ഭിന്നമാണ്.
ഡോ. ഫള്ല്‍ ഹസന്‍ അബ്ബാസ്
Add Comment