ചോദ്യം: ആശൂറാ (മുഹര്‍റം പത്ത്) ദിനത്തിലെ നോമ്പിന്റെ വിധിയെന്ത്? ആശൂറാ നോമ്പുകൊണ്ട് മതിയാക്കാമോ? ഒമ്പതാം ദിവസം (താസൂആ)കൂടി നോമ്പുനോല്‍ക്കേണ്ടത് അനിവാര്യമാണോ?
ഉത്തരം: മുഹമ്മദ് സയ്യിദ് അഹ്മദ് അല്‍മുസയ്യിന്‍ (പ്രഫ.അല്‍അസ്ഹര്‍ യൂനിവേഴ്‌സിറ്റി)
മുഹറം പത്താം ദിനത്തിലെ നോമ്പ് ഇസ്‌ലാമിന്റെ ആഗമനത്തിന് മുമ്പേ അനുഷ്ഠിച്ചു പോരുന്നതാണ്. ആഇശ(റ) പറയുന്നു: ”ഇസ്‌ലാമിനു മുമ്പും ഖുറൈശികള്‍ മുഹര്‍റം പത്താം ദിവസം നോമ്പനുഷ്ഠിക്കാറുണ്ടായിരുന്നു. നബി(സ)യും ആ ദിനത്തില്‍ നോമ്പനുഷ്ഠിച്ചിരുന്നു. മദീനയിലേക്ക് ഹിജ്‌റപോയപ്പോഴും പ്രവാചകനത് തുടരുകയും മറ്റുള്ളവരോട് അപ്രകാരം ചെയ്യാന്‍ കല്‍പിക്കുകയും ചെയ്തു. റമദാനിലെ നോമ്പ് നിര്‍ബന്ധമായപ്പോള്‍ പ്രവാചകന്‍ പറഞ്ഞു: ”ആ ദിനം നോമ്പനുഷ്ഠിക്കാനാഗ്രിഹിക്കുന്നവര്‍ക്ക് നോമ്പെടുക്കുകയും ആഗ്രഹമില്ലാത്തവര്‍ക്ക് ഉപേക്ഷിക്കുകയും ചെയ്യാം.”
മറ്റൊരു റിപ്പോര്‍ട്ട് പ്രകാരം മദീനയിലെത്തിയപ്പോള്‍ അവിടെ യഹൂദരും മുഹര്‍റം പത്തിന്റെ നോമ്പെടുക്കുന്നത് കണ്ടു. അതിന്റെ കാരണം അന്വേഷിച്ചപ്പോള്‍ അവര്‍ പറഞ്ഞു: ”ഇത് മഹത്തായ ഒരു ദിനമാണ്. അന്നാണ് അല്ലാഹു മൂസ(അ)യെയും ജനതയെയും രക്ഷിച്ചതും ഫിര്‍ഔനെയും കൂട്ടരെയും കടലില്‍ മുക്കിക്കൊന്നതും. മൂസ(അ) പ്രസ്തുത ദിവസം നന്ദി സൂചകമായി നോമ്പെടുത്തു. ഞങ്ങളും അതു തുടരുന്നു.” റസൂല്‍ പറഞ്ഞു: ”ഞങ്ങളാണ് മൂസയോട് ഏറ്റവും അടുത്തവരും കടപ്പെട്ടവരും. അനുയായികളോട് ആ ദിനം നോമ്പെടുക്കാന്‍ കല്‍പിക്കുകയും ചെയ്തു.”
റസൂല്‍(സ) വളരെ പ്രാധാന്യത്തോടെ പ്രസുതുത നോമ്പ് അനുഷ്ഠിക്കാറുണ്ടായിരുന്നു എന്ന് മറ്റൊരു നിവേദനം വ്യക്തമാക്കുന്നു. ജാബിറുബ്‌നു സമുറ(റ) പറയുന്നു: ”നബി(സ) ആശൂറാ ദിനത്തിലെ നോമ്പനുഷ്ഠിക്കാന്‍ ഞങ്ങളുടെ കല്‍പിക്കുകയും പ്രോത്സാഹിപ്പിക്കുകയും ചെയ്തിരുന്നു. ഞങ്ങള്‍ ആ ദിവസം നോമ്പനുഷ്ഠിക്കുന്നുണ്ടോ എന്ന് പ്രവാചകന്‍ നിരീക്ഷിക്കാറുമുണ്ടായിരുന്നു.”
തുടക്കത്തില്‍ ആശൂറാഅ് നോമ്പ് നിര്‍ബന്ധമായിരുന്നു. എന്നും പിന്നീട് റമദാന്‍ നോമ്പ് നിര്‍ബന്ധമായപ്പോള്‍ അത് ഐഛിക(സുന്നത്ത്) കര്‍മമായി തിര്‍ന്നു. എന്നുമാണ് ചില പണ്ഡിത•ാരുടെ അഭിപ്രായം
നബി(സ) ആശൂറ ദിനത്തില്‍ മാത്രമേ നോമ്പനുഷ്ഠിച്ചിട്ടുള്ളൂ. എന്നാല്‍ അന്യാചാരങ്ങളില്‍നിന്നും അനുഷ്ഠാനങ്ങളില്‍നിന്നും വ്യതിരിക്തത പുലര്‍ത്തുന്നതിനുവേണ്ടി അല്ലാഹു ഉദ്ദേശിച്ചാല്‍ അടുത്ത കൊല്ലം മുഹര്‍റം ഒമ്പതാം ദിനം കൂടി നാം നോമ്പെടുക്കുന്നതാണ്.” എന്ന് നബി(സ) പറഞ്ഞിരുന്നു. എന്നാല്‍ അടുത്ത കൊല്ലം പ്രസ്തുത സമയമെത്തുന്നതിനുമുമ്പ് നബി(സ) ലോകത്തോട് വിടപറഞ്ഞു. ഇതിന്റെ അടിസ്ഥാനത്തില്‍ പണ്ഡിത•ാര്‍ ഇങ്ങനെ വ്യക്തമാക്കിയിരിക്കുന്നു: മുഹര്‍റം ഒമ്പതും പത്തും ദിവസങ്ങള്‍ ചേര്‍ത്ത് നോമ്പനുഷ്ഠിക്കുന്നതാണ് സുന്നത്ത്. കാരണം നബി പത്താം ദിവസം നോമ്പനുഷ്ഠിക്കുകയും ഒമ്പതാം ദിവസം നോമ്പെടുക്കാന്‍ തീരുമാനിക്കുകയും ചെയ്തതാണ്. നബി(സ) പറഞ്ഞിരിക്കുന്നു: ”റമദാന്‍ മാസത്തിലെ നോമ്പിനുശേഷം ഏറ്റവും ശ്രേഷ്ഠമായിട്ടുള്ളത് അല്ലാഹുവിന്റെ മാസമായ മുഹര്‍ത്തിലെ നോമ്പാകുന്നു.”
Add Comment