Home / ചോദ്യോത്തരം / ഫത് വ / മുഹമ്മദ് നബി-ഫത്‌വ / മുഹമ്മദ് നബി(സ)യെ എല്ലാവരുമറിയട്ടെ !

മുഹമ്മദ് നബി(സ)യെ എല്ലാവരുമറിയട്ടെ !

ചോ:നാടെങ്ങും  നബിദിനം കൊണ്ടാടുന്ന വേളയില്‍ ഈ അവസരം ഉപയോഗപ്പെടുത്തി മുഹമ്മദ് നബി(സ)യെ അമുസ്‌ലിംസഹോദരങ്ങള്‍ക്ക് പരിചയപ്പെടുത്താന്‍ നമുക്ക് കഴിയില്ലേ ?

…………………………………………

മുസ്‌ലിംകളെന്ന നിലക്ക് അല്ലാഹുവിനെക്കഴിഞ്ഞാല്‍ നാം ഏറ്റവും കൂടുതല്‍ ഇഷ്ടപ്പെടുന്നത് മുഹമ്മദ് നബി(സ)യെയാണ്. പ്രവാചകനോടുള്ള പ്രസ്തുതസ്‌നേഹം പ്രകടിപ്പിക്കാന്‍ ഒട്ടേറെ അനുവദനീയ മാര്‍ഗങ്ങള്‍ നമുക്കുമുമ്പിലുണ്ട്. അത്തരത്തില്‍ സ്‌നേഹം പ്രകടിപ്പിക്കുന്നത് ഇക്കാലത്തെ മുസ്‌ലിംകള്‍ക്ക് വളരെയേറെ പ്രയോജനപ്രദമാണ്.

മുഹമ്മദ് നബി(സ) ജനിച്ച റബീഉല്‍അവല്‍ മാസത്തില്‍ പ്രത്യേകമായിത്തന്നെ പ്രവാചകജീവചരിത്രം പഠിക്കാനും അദ്ദേഹത്തിന്റെ ജീവിതരീതികള്‍ അനുസ്മരിക്കാനും അവ ജീവിതത്തില്‍ പകര്‍ത്താനും അവ മുസ്‌ലിം-അമുസ് ലിം ഭേദമന്യേ മറ്റുള്ളവര്‍ക്ക് പഠിപ്പിച്ചുകൊടുക്കാനും നാം ഈ അവസരം ഉപയോഗിക്കണം. ജീവിതത്തില്‍ പ്രവാചകന്‍ എങ്ങനെയായിരുന്നു എല്ലാവരോടും ഇടപെട്ടിരുന്നതെന്ന് ചരിത്രോദാഹരണങ്ങള്‍ സഹിതം  ഇതരമതസമുദായങ്ങളില്‍പെട്ടവര്‍ക്ക് വിശദീകരിച്ചുകൊടുക്കണം. ആയിരത്തിനാനൂറില്‍ചില്വാനം വര്‍ഷങ്ങള്‍ക്കുമുമ്പ് ജീവിച്ചിരുന്ന ആ മഹാത്മാവ് ആഗോളസമൂഹത്തിന്റെ നേതാവാണെന്നും ലോകാവസാനംവരെയും ആയിരിക്കുമെന്നും സ്വജീവിതത്തിലൂടെ അവര്‍ക്ക് കാണിച്ചും വിശദീകരിച്ചുംകൊടുക്കുക.

വ്യത്യസ്തമേഖലയിലുള്ള ജനവിഭാഗങ്ങളെ പ്രവാചകജീവിതത്തിലേക്ക് വെളിച്ചം വീശുന്ന പ്രഭാഷണപരിപാടികള്‍, സെമിനാറുകള്‍ തുടങ്ങിയ സംഘടിപ്പിച്ച് അതിലേക്ക് ക്ഷണിക്കാം.

പ്രവാചകനോടുള്ള ഇഷ്ടം പ്രകടിപ്പിക്കുന്ന സ്‌നേഹവികാരം അതിരുകവിയാത്ത കവിതകള്‍, പാട്ടുകള്‍ എന്നിവ ചൊല്ലുന്ന വേദികള്‍ സംഘടിപ്പിക്കാം.

പ്രവാചകജീവിതത്തെ സംബന്ധിച്ച ഉപന്യാസമത്സരം, ലേഖനമത്സരം  തുടങ്ങിയവ നടത്താം.

മേല്‍പറഞ്ഞ രീതിയിലുള്ള പരിപാടികളില്‍ കക്ഷിവ്യത്യാസമില്ലാതെ എല്ലാ മുസ് ലിംസഹോദരങ്ങളെയും ക്ഷണിക്കാന്‍ പ്രത്യേകം ശ്രദ്ധിക്കണം.

പ്രവാചകസ്‌നേഹം പ്രകടിപ്പിക്കാനും മുഹമ്മദ് നബിയുടെ പ്രസക്തി ആധുനികസമൂഹത്തില്‍ എത്രത്തോളം സംഗതമാണെന്നും ബോധ്യപ്പെടുത്തുന്ന മേല്‍പറഞ്ഞ പരിപാടികള്‍ അവതരശൈലികള്‍കൊണ്ടും ആസൂത്രണംകൊണ്ടും ആകര്‍ഷകവും ഫലപ്രദവുമാക്കാമെന്ന് കൂട്ടത്തില്‍ ഓര്‍ക്കേണ്ടതാണ്.

എല്ലാറ്റിനെയും സംബന്ധിച്ച് അല്ലാഹുവാണ് ഏറ്റവും നന്നായി അറിയുന്നവന്‍.

 

About ശൈഖ് അഹ്മദ് കുട്ടി

Check Also

നബി(സ)യുടെ മാതാപിതാക്കള്‍ നരകത്തിലോ ?

പ്രവാചകന്റെ ഉമ്മ ആമിന ബീവിയുടെ കാര്യത്തില്‍ പ്രവാചക തിരുമേനി പറഞ്ഞതായി ഒരു സ്വഹീഹായ ഹദീസുണ്ട്്. തിരുമേനി പറഞ്ഞു: ‘എന്റെ മാതാവിന് …