Home / Special Coverage / Ramadan in history / റമദാന്‍ മുപ്പത്

റമദാന്‍ മുപ്പത്

* അംറുബ്‌നു ആസിന്റെ മരണം:
ക്രി. 664, ഹിജ്‌റ 43 റമദാന്‍ 30 നാണ് അംറുബ്‌നുല്‍ ആസ് നൂറാം വയസ്സില്‍ മരണപ്പെടുന്നത്.
* ഇമാം ബുഖാരിയുടെ മരണം:
ക്രി. 869 ആഗസ്ത് 31, ഹിജ്‌റ 256 റമദാന്‍ 30 നാണ് ഇമാം ബുഖാരി എന്ന ചുരുക്കപ്പേരില്‍ വിശ്വപ്രസിദ്ധനായ മുഹമ്മദിബ്‌നു ഇസ്്മാഈല്‍ ഇബ്‌നു ഇബ്രാഹീമിബ്‌നു മുഗീറ മരണപ്പെടുന്നത്. ഹദീസിലെ അമീറുല്‍ മുഅ്മിനീന്‍ എന്ന അപരനാമവുമുണ്ട്. വിശുദ്ധ ഖുര്‍ആന്‍ കഴിഞ്ഞാല്‍ ഏറ്റവും അവലംബനീയമായ ഗ്രന്ഥമായി മുസ്്‌ലിംകള്‍ കണക്കാക്കുന്നത് അദ്ദേഹത്തിന്റെ ഹദീസ് ഗ്രന്ഥം സ്വഹീഹുല്‍ ബുഖാരിയെയാണ്.

* ഇമാം ഇബ്‌നു ഹസമിന്റെ ജനനം:
ക്രി. 994 നവംബര്‍ 7, ഹിജ്‌റ 384 റമദാന്‍ 30നാണ് ഇബ്‌നു ഹസന്‍ എന്ന ചുരുക്കപ്പേരില്‍ ഇസ്്‌ലാമിക ലോകത്ത് പ്രസിദ്ധനായ മുഹമ്മദിബ്‌നു അലിയ്യിബ്‌നു സഈദ് ജനിക്കുന്നത്. ഹിജ്‌റ അഞ്ചാം നൂറ്റാണ്ടിലെ പ്രമുഖ വക്താവും, ചരിത്രം, മതതാരതമ്യ പഠനം തുടങ്ങിയ മേഖലകളില്‍ നിരവധി കനപ്പെട്ട ഗ്രന്ഥങ്ങള്‍ രചിച്ച പ്രതിഭാശാലിയുമാണദ്ദേഹം. ‘അല്‍ മഹല്ലി’, ‘അല്‍ ഫസല്‍ ഫില്‍ മിലല്‍ വല്‍ അഹ് വാഉ വന്നഹല്‍’ എന്നിവ അദ്ദേഹത്തിന്റെ പ്രസിദ്ധ ഗ്രന്ഥങ്ങളാണ്.
റമദാന്‍-30
ഇമാം ബുഖാരി അന്തരിച്ചു.
അല്‍ബുഖാരി അല്ലെങ്കില്‍ ഇമാം ബുഖാരി എന്നിങ്ങനെ അറിയപ്പെടുന്ന മുഹമ്മദ് ഇബ്‌നു ഇസ്മായീല്‍ അല്‍ബുഖാരി (810-870) പ്രമുഖ ഇസ്ലാമിക പണ്ഡിതനും മുഹദ്ദിസുമാണ്. സ്വഹീഹുല്‍ ബുഖാരി എന്ന പ്രമുഖ ഹദീസ് ഗ്രന്ഥത്തിന്റെ പേരിലാണ് അദ്ദേഹം പ്രശസ്തനായത്, വിശുദ്ധ ഖുര്‍ആന്‍ കഴിഞ്ഞാല്‍ മുസ്ലിങ്ങള്‍ ഏറ്റവും ആധികാരികമെന്ന് കരുതുന്ന മതഗ്രന്ഥമാണ് സ്വഹീഹുല്‍ ബുഖാരി. മുഹമ്മദ് ഇബ്‌നു ഇസ്മായീല്‍ ഇബ്‌നു ഇബ്രാഹീം ഇബ്‌നു അല്‍മുഗീറ ഇബ്‌നു ബര്‍ദിസബ അല്‍ബുഖാരി  എന്നാണ് ഇദ്ദേഹത്തിന്റെ പൂര്‍ണ്ണ നാമം.ഇന്നത്തെ ഉസ്ബാക്കിസ്ഥാനില്‍പ്പെട്ട ബുഖാറഃ (അക്കാലത്ത് ഖുറാസാനിന്റെ ഭാഗം) എന്ന പട്ടണത്തില്‍ എ.ഡി 810 ജൂലൈ 20 (ഹിജ്‌റ 194 ശവ്വാല്‍ 13) നാണ് ഇമാം ബുഖാരി ജനിച്ചത്. പിതാവ് ഇസ്മായീല്‍ ഇബ്‌നു ഇബ്‌റാഹീം അന്നത്തെ പ്രമുഖ ഹദീസ് പണ്ഡിതനായിരുന്നു.
ഇസ്ലാമിലെ അഞ്ച് ഹദീസ് ശേഖരങ്ങളില്‍ ഏറ്റവും പ്രധാനപ്പെട്ട ഒരു ഹദീസ് ശേഖരമാണ് സ്വഹീഹുല്‍ ബുഖാരി. അദ്ദേഹത്തിന്റെ ജീവിതകാലത്തുതന്നെ ഈ ഗ്രന്ഥം പ്രസിദ്ധീകരിക്കുകയുണ്ടായി. മുസ്‌ലിംകളില്‍ ഭൂരിപക്ഷവും ഈ ഹദീസ് ശേഖരത്തെ ഏറ്റവും വിശ്വാസ്യയോഗ്യമായ ഒന്നായി കണക്കാക്കുന്നു. അതിനാല്‍ ഖുര്‍ആന്‍ കഴിഞ്ഞാല്‍ ഏറ്റവും ആധികാരികതയുള്ള ഗ്രന്ഥമായി ഇത് വിശേഷിപ്പിക്കപ്പെടുന്നു.
സ്വഹീഹുല്‍ ബുഖാരി എന്ന് പൊതുവായി വിളിക്കപ്പെടുന്ന ഈ ഹദീസ് ശേഖരത്തിന്റെ യഥാര്‍ത്ഥ പേര്:’അല്‍ ജാമിഉസ്‌സ്വഹീഹ് അല്‍മുസ്‌നദ് അല്‍മുഖ്തസര്‍ മിന്‍ ഉമൂരി റസൂലില്ലാഹ് വ സുനനിഹി വ അയ്യാമിഹി’ എന്നാണ്. അതിന്റെ മലയാള വിവര്‍ത്തനം ഇങ്ങനെയാണ്:’പ്രവാചകന്റെ കാലഘട്ടവും പ്രവൃത്തിയും പ്രവാചകനുമായി ബന്ധപ്പെട്ട മറ്റു കാര്യങ്ങളുടെയും കണ്ണിചേര്‍ത്തുള്ള ആധികാരിക ഹദീസുകളുടെ ഹ്രസ്വശേഖരം
ആദ്യകാലത്തുള്ള ഹദീസ് ശേഖരങ്ങള്‍ ബുഖാരി വായിച്ചപ്പോള്‍ അവയില്‍ സ്വഹീഹും ഹസനുമായ ഹദീസുകളോടൊപ്പം തന്നെ ദുര്‍ബലമായ(ദഈഫ്) നിരവധി ഹദീസുകളും ഉള്‍കൊള്ളുന്നതായി മനസ്സിലായി.ഇത് അദ്ദേഹത്തെ ആധികാരിക ഹദീസുകള്‍ ശേഖരിക്കുന്നതില്‍ താല്പര്യം ജനിപ്പിച്ചു. ബുഖാരിയുടെ ഈ തീരുമാനത്തെ കൂടുതല്‍ പ്രചോദിപ്പിച്ചത് അദ്ദേഹത്തിന്റെ അധ്യാപകനായിരുന്ന ഇസ്ഹാഖ് ഇബ്‌നു ഇബ്‌റാഹിം അല്‍ ഹന്‍ദലി ആയിരുന്നു. ഈ അധ്യാപകന്‍ ഒരിക്കല്‍ ഇങ്ങനെ പറഞ്ഞതായി ബുഖാരി പറയുന്നു:’ഞങ്ങള്‍ ഇസ്ഹാഖ് ഇബ്‌നു റുഅ്‌യയുടെ (അങ്ങനെയാണ് അദ്ദേഹത്തിന്റെ ചുരുക്കനാമം) അടുത്തായിരുന്ന സന്ദര്‍ഭത്തില്‍ അദ്ദേഹം ചോദിച്ചു:’ പ്രവാചകന്റെ ഹദീസുകളിലെ ഏറ്റവും ആധികാരികമായ ഹദീസ് ശേഖരം നീ ചെയ്യുമോ’ ഈ അഭിപ്രായമാണ് സ്വഹീഹ് എന്ന ശേഖരം നടത്താന്‍ നിമിത്തമായത്.ബുഖാരി ഇങ്ങനെയും പറഞിട്ടുണ്ട്.’ഞാന്‍ പ്രവാചകന്റെ മുന്നില്‍ നില്‍ക്കുന്നതായി  സ്വപ്നം കണ്ടിരിക്കുന്നു.എന്റെ കയ്യിലുള്ള വിശറികൊണ്ട് പ്രവാചകനെ ഞാന്‍ സംരക്ഷിക്കുകയായിരുന്നു.’ഈ സ്വപ്നത്തെകുറിച്ച് ഞാന്‍ പല സ്വപ്നവ്യഖ്യാതാക്കളോടും ചോദിച്ചപ്പോള്‍ അവര്‍ പറഞ്ഞത് നീ പ്രവാചകനെ അസത്യങ്ങളില്‍ നിന്ന് മോചിപ്പിക്കും എന്നായിരുന്നു .ഇതു എന്നെ സ്വഹീഹ് ശേഖരിക്കാന്‍ ശക്തമായി പ്രേരിപ്പിച്ചു’.

ഇബ്‌നു അല്‍ സലാഹ് പറയുന്നു:സ്വഹീഹിന്റെ ആദ്യ കര്‍ത്താവു ബുഖാരിയാണ്. പിന്നെ മുസ്ലിമും. ബുഖാരിയുടെ വിദ്യാര്‍ത്ഥിയായിരുന്നു ഇമാം മുസ്ലിം.അദ്ധ്യാപകന്റെ അഭിപ്രായങ്ങളില്‍ പലതും ശിഷ്യനും പങ്കുവെക്കുന്നു.ഖുര്‍ആന്‍ കഴിഞ്ഞാല്‍ ഏറ്റവും ആധികാരികമായ രണ്ട് ഹദീസ്ഗ്രന്ഥങ്ങളാണ് ഇവ. ഇമാം ശാഫി ഇങ്ങനെ അഭിപ്രായപ്പെട്ടു.:ഇമാം മാലികിന്റെ ഗ്രന്ഥത്തേക്കാല്‍ കൂടുതല്‍ ശരിയായ വിവരമുള്ള മറ്റൊന്ന് എനിക്കറിയില്ല. മറ്റു വാചകങ്ങളിലൂടെയും ഇത് റിപ്പോര്‍ട്ടുചെയ്യുന്നുണ്ട്.എന്നാല്‍ ബുഖാരിയുടെയും മുസ്ലിമിന്റെയും ഹദീസ് ഗ്രന്ഥങ്ങള്‍ ഇറങ്ങുന്നതിന് മുമ്പ് പ്രകടിപ്പിച്ച അഭിപ്രായമാണിത്. ഈ രണ്ട് ഗ്രന്ഥങ്ങളില്‍ ഇമാം ബുഖാരിയുടെതാണ് കൂടുതല്‍ ആധികാരികവും ഉപകാരപ്രദവും .ഇബ്‌നു ഹജര്‍,അബൂ ജഅ്ഫറുല്‍ ഉഖൈലി പറയുന്നതായി ഉദ്ധരിക്കുന്നു:’ബുഖാരി തന്റെ ഹദീസ് ഗ്രന്ഥം എഴുതിയതിന് ശേഷം അത് അദ്ദേഹം അലിയ്യിബുനു അല്‍ മദീനി,അഹ്മദുബ്‌നു ഹമ്പല്‍,യഹിയബ്‌നു മാഈന്‍,എന്നിവര്‍ക്കും മറ്റുചിലര്‍ക്കും വായിച്ചു കേള്‍പ്പിക്കുകയുണ്ടായി.മഹത്തായ ഒരു ശ്രമമായി അവരെല്ലാം ഇതിനെ പരിഗണിച്ചു.മാത്രമല്ല നാലു ഹദീസുകള്‍ ഒഴികെയുള്ള മറ്റെല്ലാ ഹദീസുകളെയും ആധികാരികമാണെന്ന് അവരെല്ലാം സാക്ഷ്യപ്പെടുത്തുകയും ചെയ്തു. പിന്നീട് ഉഖൈലി പറയുന്നു. ആ നാലു ഹദീസുകളെ സംബന്ധിച്ചിടത്തോളം ബുഖാരി ശരിയായിരുന്നു.ഇബ്‌നു ഹജര്‍ പിന്നീട് ഇങ്ങനെ ഉപസംഹരിക്കുന്നു:യഥാര്‍ത്ഥത്തില്‍ അവയെല്ലാം ശരിയാണ്.എല്ലാ ആധികാരിക ഹദീസുകളും ഉള്‍കൊള്ളുന്നില്ല.
ഇബ്‌നു അല്‍സലാഹ് തന്റെ മുഖദ്ദിമ എന്ന ഗ്രന്ഥത്തില്‍ പറയുന്നു:ബുഖാരി ഇങ്ങനെ പറഞ്ഞതായി നമുക്ക് വ്യക്തമാക്കപെട്ടിരിക്കുന്നു:അല്‍ ജാമിഅയില്‍ ഞാന്‍ ആധികാരികമല്ലാത്ത ഹദീസുകളൊന്നും ഉള്‍പെടുത്തിയിട്ടില്ല.സംക്ഷിപ്തമാക്കുന്നതിനായി എല്ലാ ആധികാരിക ഹദീസുകളും ഞാനിതില്‍ ഉള്‍കൊള്ളിച്ചിട്ടുമില്ല. കൂടാതെ അല്‍ദഹബി പറഞു:ഒരു ലക്ഷം ഹദീസുകള്‍ ഞാന്‍ ഹൃദിസ്ഥമാക്കി. അത്രതന്നെ ആധികാരികമല്ലാത്ത രണ്ടുലക്ഷം ഹദീസുകളും മന:പാഠമാക്കി എന്ന് ബുഖാരി ഇമാം പറഞ്ഞതായി ഞാന്‍കേട്ടിട്ടുണ്ട്.
ഹദീസുകളുടെ എണ്ണം

ഇബ്‌നു അല്‍സ്വലാഹ് പറയുന്നു:7275 ഹദീസുകളാണ് ബുഖാരിയുടെ സ്വഹീഹിലുള്ളത്.ആവര്‍ത്തിച്ചു വരുന്ന ഹദീസുകളുള്‍പ്പെടെയാണിത്.ആവര്‍ത്തിച്ച് വന്നിട്ടുള്ള ഹദീസുകളെ ഒഴിച്ചുനിര്‍ത്തിയാല്‍ ബാക്കിയുള്ളവ 4000 ആണെന്ന് വ്യക്തമാക്കപ്പെട്ടിട്ടുണ്ട്. ഇത് മുസ്‌നദ് എന്നാണ് പരിഗണിക്കപ്പെടുന്നത്.യഥാര്‍ഥ പരമ്പരയോടുകൂടി പ്രവാചകന്റെ സഹാബികളില്‍ നിന്ന് ഉദ്ധരിക്കപട്ടതാണിത്.
നീണ്ട പതിനാറുവര്‍ഷം ശരിയായ ഉറവിടത്തില്‍ നിന്ന് ഹദീസുകള്‍ തേടിഅബ്ബാസീ ഭരണനിയന്ത്രണത്തിലുള്ള മേഖലയിലാകെ അല്‍ബുഖാരി യാത്ര ചെയ്തു. 300000 ഹദീസുകള്‍ ശേഖരിച്ചെങ്കിലും 2602 ഹസീസുകള്‍ മാത്രമാണ് അല്‍ബുഖാരി തന്റെ സ്വഹീഹില്‍ ഉള്‍പ്പെടുത്തിയത് എന്ന് പറയപ്പെടുന്നു. മുകളില്‍ സൂചിപ്പിച്ച ഇബ്‌നു അല്‍സ്വലാഹിന്റെ കണക്കുപ്രകാരമുള്ള ഹദീസുകളുടെ എണ്ണവുമായി ഈ എണ്ണത്തിന് വ്യത്യാസമുണ്ട്. പ്രാര്‍ത്ഥനകള്‍ എങ്ങനെ നിര്‍വ്വഹിക്കണം എന്നു തുടങ്ങി ജീവിതത്തിന്റെ നിഖിലമേഖലയേയും സ്പര്‍ശിക്കുന്ന, മുഹമ്മദ് നബിയിനിന്ന് നേരിട്ടുള്ള ഇസ്ലാമിന്റെ മാര്‍ഗദര്‍ശനം ഉള്‍കൊള്ളുന്നതാണ് ഈ ഹദീസുകള്‍. ഒമ്പതുഖണ്ഡങ്ങളായി 16 വര്‍ഷമെടുത്ത് പൂര്‍ത്തിയാക്കിയ ഈ ഹദീസ് ശേഖരത്തിലെ ഒരോ ഹദീസും രേഖപെടുത്തുന്നതിന് മുമ്പും അംഗശുദ്ധിവരുത്തി (വുദു) അല്ലാഹുവിനോട് മാര്‍ഗ്ഗദര്‍ശനത്തിന് പ്രാര്‍ത്ഥിച്ച് രണ്ട് റക്അത്ത് നമസ്‌കരിക്കുമായിരുന്നു ഇമാം അല്‍ബുഖാരി. പിന്നീടദ്ദേഹം ആവശ്യമായ ഗവേഷണവും അന്വേഷണവും നടത്തുകയും ചെയ്യും. ആധികാരികതയുറപ്പിക്കുംവിധം  കൃത്യമായ മാനദണ്ഡങ്ങള്‍ പൂര്‍ത്തിയാക്കുന്നതാണെങ്കില്‍ മാത്രം ആ ഹദീസിനെ അദ്ദേഹം എഴുതിവെക്കും. പ്രഗല്ഭ ഹദീസു പണ്ഡിതരായ (മുഹദ്ദിസുകള്‍) അഹമദ്ബ്‌നു ഹമ്പല്‍ (855), ഇബ്‌നു മഇന്‍ (847),ഇബ്‌നു മദ്‌നി (848) എന്നിവരെല്ലാം അല്‍ബുഖാരിയുടെ ഹദീസ് ഗ്രന്ഥത്തിന്റെ ആധികാരികതയെ അംഗീകരിച്ചിട്ടുണ്ടെന്ന് പറയുന്നു. അതിനാല്‍ 846 ല്‍ അദ്ദേഹം ഈ ഹദീസ് ഗ്രന്ഥം പൂര്‍ത്തിയാക്കുകയും തന്റെ ജീവിതത്തിലെ ബാക്കി 24 വര്‍ഷം മറ്റു പട്ടണങ്ങളില്‍ യാത്രചെയ്ത് പണ്ഡിതന്മാരുമായി കൂടിക്കാഴ്ച്ച നടത്തി താന്‍ ശേഖരിച്ച ഹദീസുകള്‍ അവരെ പഠിപ്പിക്കുകയും ചെയ്തു. അദ്ദേഹം എത്തുന്ന ഏതൊരു നഗരത്തിലും അദ്ദേഹത്തിന്റെ ഹദീസ് വിവരണംകേള്‍ക്കാന്‍ ആയിരക്കണക്കായ ജനങ്ങള്‍ അവിടുത്തെ പ്രധാനപള്ളികളില്‍ ഒന്നിക്കുമായിരുന്നു. ഈ ഗ്രന്ഥത്തിന്റെ പേരിനെയും അതിന്റെ  ഗ്രന്ഥകാരനെയും സംബന്ധിച്ച പാശ്ചാത്യ പണ്ഡിതരുടെ സംശയങ്ങള്‍ക്ക്  മറുപടിയായി ഇസ്‌ലാമികപണ്ഡിതര്‍ ചൂണ്ടിക്കാട്ടുന്നത് ബുഖാരിയുടെ കാലത്തെ പ്രസിദ്ധ ഹദീസ് പണ്ഡിതരായ അഹമദുബ്‌നു ഹമ്പലും , ഇബ്‌നു മഈന്‍  ,ഇബ്‌നു മഅദ്‌നി എന്നിവരും ഈ ഹദീസ് ഗ്രന്ഥത്തിന്റെ ആധികാരികതയെ അംഗീകരിച്ചിട്ടുണ്ടെന്ന വസ്തുതയാണ്.
ഈ ഇരുപത്തിനാലു വര്‍ഷത്തിനിടയില്‍ ബുഖാരി തന്റെ ഗ്രന്ഥത്തില്‍ ചില കൊച്ചു പരിഷ്‌കാരങ്ങള്‍ വരുത്തുകയുണ്ടായി.പ്രധാനമായും അധ്യായങ്ങളുടെ തലക്കെട്ടുകളായിരുന്നു അവ. ഒരോ പതിപ്പിനും അതിന്റെ വ്യാഖ്യാതാക്കളുടെ പേരു നല്‍കപെട്ടു.ഇബ്‌നു ഹജറുല്‍ അസ്ഖലാനിയുടെ ‘നുകത്’എന്ന ഗ്രന്ഥത്തില്‍ ഇങ്ങനെ പറയുന്നു.എല്ലാ പതിപ്പുകളിലും ഹദീസുകളുടെ എണ്ണം ഒന്നു തന്നെയായിരുന്നു.ബുഖാരിയുടെ വിശ്വസ്തനായ ശിഷ്യന്‍ അല്‍ഫര്‍ബരിയുടെ വ്യാഖ്യാനമാണ് പ്രശസ്തമായ ഒന്ന്.’കിതാബുല്‍ ബാഗ്ദാദി’ (ബാഗ്ദാദിന്റെ ചരിത്രം) എന്ന അദ്ദേഹത്തിന്റെ പുസ്തകത്തില്‍ അല്‍ഫര്‍ബരി പറയുന്നു:എന്റെ കൂടെ എഴുപതിനായിരം ആളുകള്‍ അല്‍ബുഖാരിയെ ശ്രവിച്ചിട്ടുണ്ട്.
അല്‍ഫര്‍ബരി മാത്രമായിരുന്നില്ല സ്വഹീഹുല്‍ ബുഖാരിയുടെ വ്യാഖ്യാതാവ്. പിന്‍തലമുറയിലെ നിരവധി ആളുകള്‍ ഈ ഹദീസ് സമാഹാരത്തിന് വ്യാഖ്യാനമെഴുതീട്ടുണ്ട്.ഇബ്‌റാഹീമിബ്‌നു മഅ്കല്‍ ,ഹമ്മാദ്ബ്‌നു ശുക്ര്‍, മന്‍സൂര്‍ ബര്‍ദൂസി,ഹുസൈന്‍ മഹ്മലി എന്നിവരും ഇതില്‍ ഉള്‍പ്പെടുന്നു. ഈ ഗ്രന്ഥങ്ങള്‍ തമ്മിലുള്ള വ്യത്യാസങ്ങള്‍ ചൂണ്ടിക്കാട്ടുന്ന പല ഗ്രന്ഥങ്ങളുമുണ്ട്. അവയില്‍ പ്രധാനമാണ് ഫത്ഹുല്‍ ബാരി.

About ramadan padasala

Check Also

റമദാന്‍ ഇരുപത്തിയാറ്:

* തബൂക്ക് യുദ്ധത്തില്‍ നിന്നുള്ള മടക്കം: തബൂക്ക് യുദ്ധത്തില്‍ നിന്നുള്ള പ്രവാചകന്‍(സ)യുടെ മടക്കം റമദാന്‍ 26 നായിരുന്നു. ചില സഹാബികള്‍ …

Leave a Reply

Your email address will not be published. Required fields are marked *